Катонқарағай ауданындағы Берел музей-қорықта заманауи цифрлық инфрақұрылымды дамыту бағытында маңызды қадам жасалды. Мекеме аумағында тұрақты әрі жоғары жылдамдықтағы интернет байланысын қамтамасыз ететін Starlink спутнигі орнатылды, деп хабарлайды F16.kz.
Бұл шешім шалғай әрі таулы аймақта орналасқан нысан үшін байланыс сапасын айтарлықтай жақсартуға мүмкіндік берді. Жаңа жүйенің іске қосылуы музей-қорыққа келушілер, ғылыми-зерттеу жұмыстарымен айналысатын топтар және мекеме қызметкерлері үшін қолайлы жағдай туғызады. Енді олар биік таулы өңірдің күрделі географиялық ерекшеліктеріне қарамастан, сенімді әрі үздіксіз интернет байланысын пайдалана алады. Бұл, әсіресе, ақпарат алмасу мен жұмыстың тиімділігін арттыруға оң әсерін тигізіп отыр.
Енді келушілер, ғылыми-зерттеу топтары мен қызметкерлер таулы аймақта да сенімді байланысқа қол жеткізе алады. Starlink-тің жоғары өткізу қабілетінің арқасында цифрлық желілерге материалдарды жедел жолдау, онлайн трансляциялар жүргізу, бейнебайланыс орнату және заманауи мультимедиалық сервистермен музей аумағында тікелей жұмыс істеу мүмкін болды, — деп атап өтті мекеме өкілдері.
Мекеме өкілдерінің айтуынша, аталған технологиялық шешім ғылыми-зерттеу жұмыстарын жүргізу мүмкіндіктерін де кеңейтті. Жиналған деректерді өңдеу, материалдарды цифрлық форматта сақтау және оларды уақтылы тарату бұрынғыдан әлдеқайда жеңілдеді. Сонымен қатар бұл жаңашылдық музей-қорыққа келген қонақтарға жайлы жағдай жасауға да оң ықпал етеді.
