Биыл жазда Абай облысының Бестерек ауылында болған жол—көлік оқиғасы бойынша сот үкімі шықты. Жол қозғалысы ережесін бұзған 55 жастағы жүргізуші кінәлі деп танылып, 9 жылға бас бостандығынан айыру жазасына кесілді, деп хабарлайды F16.kz.
Сот процесі кезінде прокурор айыпталушыға 9 жыл 6 ай түрме жазасын сұраған. Соңғы сөзінде ер адам өз кінәсін мойындап, қаза тапқан және зардап шеккен балалардың ата-ансынан, туыстарынан кешірім сұрады.
Естеріңізде болса, жол-көлік оқиғасы биыл 19 тамызда Үржар ауданының Бестерек ауылында болған. Автокөлік жүргізушісі қақпаның арғы жағында ойнап жүрген алты баланы қағып кеткен. Олардың үшеуі оқиға орнында қаза тапты, мерт болған бүлдіршіндердің ең кішісі екі жаста, ең үлкені сегіз жаста еді. Тағы үш бала түрлі жарақатпен аудандық ауруханаға түсті. Кейін олардың екеуі санавиациямен Астанаға жеткізіліп, емделіп шықты. Ал 9 жастағы қыз баланы қыркүйекте санитарлық авиациямен Семей медицина университеті ауруханасына жеткізіп, тиісті ем-дом көрсетілгенмен беті бері қарамады. Ол қазан айында көз жұмды.
Қамауға алынған жүргізушінің туыстары қайғылы оқиғаның себебі жүрек талмасы ауруынан болғанын айтқан.
