Абай облысының Бестерек ауылындағы жол-көлік оқиғасынан кейін ауыр халде санитарлық авиациямен Астанаға жеткізілген екі бала ауруханадан шығарылды, деп хабарлайды F16.kz.
Дәрігерлердің айтуынша, зардап шеккен балалардың өмірін аман алып қалу үшін мамандар барын салды.
Біздің дәрігерлер тобы күрделі операциялар жасап, толыққанды ем жүргізді. Кәсіби шеберліктерінің арқасында балалардың өмірін аман алып қалу мүмкін болды, – деді аурухана директоры Гүлнар Құлушева.
Қазір екі бала да үйлеріне шығарылды. Денсаулықтары қалыпты, алаңдауға ешқандай негіз жоқ.
Ата-аналары қуанып, ақ халатты жандарға шын жүректен алғыс білдірді. Ең бастысы – балалардың өміріне еш қауіп жоқ. Алдағы оңалтулары жеңіл өтіп, денсаулық пен бақытты балалық шақ тілейміз, – деді аурухана басшысы.
Еске сала кетсек, 19 тамызда Үржар ауданының Бестерек ауылында Toyota көлігін тізгіндеген 55 жастағы жүргізуші рөлге ие бола алмай үйдің ауласында ойнап жүрген балаларды қағып кеткен. Оқиға салдарынан үш бала қаза тауып, тағы үшеуі жарақат алған. Зардап шеккен екі бала санавиациямен Астанаға жеткізілген, ал жолды көтере алмайтын қыз бала аудандық аурухананың жансақтау бөліміне жатқызылды. Оның жағдайы әлі де ауыр екенін айтады дәрігерлер.
