Жолаушылар арасында пойызға кешігіп қалатын қолайсыз жағдайлар жиі кездеседі. «Жолаушылар тасымалы» АҚ пойызға кешігіп қалған жағдайда не істеу керектігін еске салды, деп хабарлайды F16.kz.
«Жолаушылар тасымалы» АҚ баспасөз қызметінің мәліметінше, кешіккен адам алдымен вокзалдағы билет кассасына барып, жағдайды кассирге хабарлау қажет. Егер жолаушы пойызға үлгермей қалса, билет құнын жартылай қайтарып алуға мүмкіндігі бар. Бірақ бұл рәсімді пойыз билетте көрсетілген станциядан жөнелтілген сәттен бастап бір сағат ішінде орындауға тиіс.
Қайтару рәсімін жүзеге асыру үшін жеке куәлік пен билетті ұсыну қажет. Кассир тиісті құжаттарды рәсімдеп, егер орын болса, келесі пойызға отырғызу мүмкіндігін қарастырады және ұсына алады. Билет құнын қайтару мөлшері мен мерзімі жолаушыларды, жүк пен багажды, сондай-ақ пошта жөнелтілімдерін теміржол көлігімен тасымалдау ережелеріне сәйкес белгіленеді.
Қосымша ақпарат алу үшін 1433 нөміріне хабарласуға болады.
«Жолаушылар тасымалы» АҚ жолаушыларға осындай жағдайлардан сақтану үшін вокзалға ертерек келу қажеттігін еске салады.
