Жаңа жыл қарсаңында қылқан жапырақты ағаштарды, оның ішінде шыршаны рұқсатсыз кесу оқиғалары жиілейді. Осыған орай Шығыс Қазақстан облысында жасыл желекті заңсыз кесуден қорғау мақсатында бақылау шаралары күшейтілді, деп хабарлайды F16.kz.
Катонқарағай мемлекеттік ұлттық табиғи паркінің мәлімдеуінше, жылдағыдай мекеме инспекторлары биыл да желтоқсан айында белсенді жұмыс істейтін болады.
1 желтоқсаннан бастап Катонқарағай ұлттық паркі аумағында бақылау шаралары күшейтіледі. Бұл кезеңде инспекторлар тәулік бойы кезекшілікке шығады, ал негізгі көлік бағыттарында бақылау бекеттері орнатылады, – деп мәлімдеген ұлттық парк өкілдері бір түп қылқан жапырақты ағашты заңсыз кескені үшін 58 980 теңге (15 АЕК) мөлшерінде айыппұл қарастырылғанын еске салды.
Айта кетейік, орманды қорғау шаралары ұлттық парк аумағында ғана емес, бүкіл Шығыс Қазақстан облысында жүргізіледі.
