Шығыс Қазақстан облысының қорғаныс істері жөніндегі департаментінде күзгі мерзімді әскери қызметке шақыру басталды. Биылғы күзде облыстан 800-ге жуық жас сарбаз әскер қатарына шақырылады, деп хабарлайды F16.kz.
Бүгінде әскерге шақыру жүйесі цифрландырылып жатыр.
Енді жеке шақырту қағазымен қатар 1414 арқылы SMS-хабарлама жіберіледі. Кейінге қалдыру немесе босатылу қызметтерін Egov.kz порталы арқылы рәсімдей алады. Әскери қызмет мәртебесі туралы мәліметтерді ешбір құжатсыз онлайн алуға болады, — деді қорғаныс істері жөніндегі департаменттің ұйымдастыру-жұмылдыру жұмыстары басқармасының бастығы, подполковник Жәнібек Сапаров.
Әскерге шақыру науқанының алғашқы кезеңінде болашақ сарбаздар шекара қызметіне қабылданады. Одан кейін жергілікті әскери басқару органдары жоспарға сәйкес Қарулы күштер, Мемлекеттік күзет қызметі, Төтенше жағдайлар министрлігі үшін әскери командаларды жасақтайды. Шақыру науқаны Ұлттық ұланға әскери командалар жасақтаумен аяқталады.
Әскер – тек міндет емес, елдің болашағына жауапкершілікпен қараудың белгісі. Сондықтан біз бұл қызметті абырой атқаруымыз керек, — деді әскерге шақырылушы Әли Мамырбеков.
Айта кетейік, мерзімді әскери қызметке шақыру биылғы қыркүйек–желтоқсан аралығында жалғасады.
