Парламент Мәжілісінің қарауына «Қазақстан Республикасы Конституциясының отыз жылдығына байланысты рақымшылық жасау туралы» заң жобасы келіп түсті, деп хабарлайды F16.kz тілшісі Kazinform агенттігіне сілтеме жасап.
Заңнама және сот-құқықтық реформа комитетінің төрағасы Снежанна Имашеваның айтуынша, құжатта мемлекеттің қауіпсіздігіне елеулі қатер төндірмейтін қылмыстар жасағаны үшін сотталғандарды босату ұсынылған.
Оның ішінде азаматтардың әлеумеуттік осал санаттары, кәмелетке толмағандар, кәмелетке толмаған балалары бар әйелдер, жүкті әйелдер, ҰОС қатысушылары мен мүгедектер және оларға теңестірілген адамдар, зейнеткерлер, мүгедектер және басқалары бар, — деді С. Имашева.
Ал, Мәжіліс депутаты Үнзила Шапақ 4,1 мың адам нақты босатылуы мүмкін екенін атап өтті.
Алдын ала есептеулерге тоқталсақ, қылмыстық атқару мекемелерінен шамамен 632 сотталған, пробация қызметінің тізімінде тұрған 3,5 мың адам босайды. Ал бас бостандығынан айыру орындарындағы 5,4 мың сотталғанға және пробация қызметінің есебінде тұрған 5,5 адамға жазаның өтелмеген мерзімін саралап қысқарту қолданылады. Сонда, барлық мерзім қысқарту 11 мың адамды қамтиды, — деді Ү. Шапақ.
Депутаттың айтуынша, 833 әйелге қатысты рақымшылық жасалады. Соның арасында 109-ы босатылса, 724 әйелдің жазаны өтеу мерзімі қысқартылады.
Фото: F16.kz/жасанды интеллект
