Қаржылық мониторинг агенттігі белгілі блогер Қайсар Қамзаға не үшін халықаралық іздеу жарияланғанын түсіндірді, деп хабарлайды F16.kz.
Күдікті 5 жыл бойы «Instagram» әлеуметтік желісінде, «qais_arr» атауымен (2,4 млн жазылушы) белсенді блогерлік қызмет жүргізіп, сондай-ақ «Telegram»-дағы «Қора энтертейнмэнт» жабық арнасын (368 мың жазылушы) басқарған.
Ол әлеуметтік желілердегі жеке аккаунттарын пайдалана отырып, Қазақстан Республикасының азаматтарына «Pinco» сайтында тіркелуге және құмар ойындарға қатысуға бағытталған тікелей сілтемелерді, графикалық элементтерді және үндеулерді қамтитын бейнематериалдар мен жарияланымдарды жүйелі түрде орналастырған. Сонымен қатар бейнероликтердің астында пайдаланушыларға бонус беретін жеке промокодын көрсеткен, – деп хабарлады ҚМА баспасөз қызметі.
Ведомствоның мәлімдеуінше, Қайсар Қамза азаматтарды құмар ойынға тартуға бағытталған онлайн-платформаны жарнамалап, одан сыйақы, бонус немесе пайыздық аударымдар түрінде табыс алып отырған. Заңсыз жолмен алынған кірісті жасыру үшін күдікті криптоәмиян пайдаланған. Оған «Pinco» интернет-казиносының ұйымдастырушыларынан төлемдер түсіп отырған.
Сот санкциясымен 182 мың АҚШ доллары көлемінде криптоактивке тыйым салынды.
