Бүгін кешке өскемендіктер Үлбінің жағасында әуелетіп ән салып, төгілтіп өлең оқиды. Күмбірлетіп күй шертіп, шешіліп сөз сөйлейді. Өйткені бұл күні Шығыстың бас шаһарында ұлы ақын Абай Құнанбайұлының 180 жылдық мерейтойына арналған «Адам болам десеңіз» атты әдеби-сазды кеш өтеді, деп хабарлайды F16.kz.
Қала тұрғындары мен қонақтары бұл жерде ұлы ақынның шығармашылығымен жақын танысып, мазмұны терең, тағылымы мол ән-жырға құлақ түріп, ақындық рух пен шабытқа толы ерекше атмосфераны сезінеді. Кез келген адам Абай туралы ойын ортаға салып, ақын өлеңдерін мәнерлеп оқи алады. Сол сияқты мұнда Абайдың он жетінші қара сөзіне негізделген «Жүректің көзі ашылса» атты театрландырылған қойылым ұсынылады. Хәкім шығармашылығына арналған үлкен кітап көрмесі де ұйымдастырылады. Көрмеде ұлы ақынның шығармалары ғана емес, Абай атамыздың Шәкәрім Құдайбердіұлы бастаған шәкірттері мен рухани мұрагерлерінің де еңбектері қойылады.
Келушілер арнайы QR-код арқылы Абай өлеңдерінің аудионұсқасын тыңдай алады. Бұл — ұлы ойшылдың терең толғаныстарын қазіргі заманғы форматта қабылдауға мүмкіндік береді.
«Абай әлемі – балалар көзімен» атты балаларға арналған комикс-аймақ болады. Комикс-платформада кішкентай қонақтар ақын шығармаларының жаңа қырын ашады.
Осы кешті ұйымдастырушылардың айтуынша, «Көзімнің қарасы», «Желсіз түнде жарық ай», «Айттым сәлем, Қаламқас» сынды Абай әндері орындалып, шараға ерекше музыкалық реңк пен ұлттық рух сыйлайды.
