Бүгін – «Наурызнама» онкүндігі аясындағы Шаңырақ күні. Қазақ мәдениетінде шаңырақ ерекше маңызға ие. Ол – отбасының, бірліктің және жаңа өмірдің белгісі. Сондықтан халқымыз жас жұбайлардың отау құрып, шаңырақ көтеруін айрықша құрметтеген, деп хабарлайды F16.kz.
Қазақ ұғымында шаңырақтың символдық мәні терең. Киіз үйдің шаңырағы ішке жарық түсіріп ғана қоймай, уықтардың басын біріктіріп, ұстап тұратын қызмет атқарады. Яғни отбасының тұтастығы мен береке-бірлігін білдіреді. Сол себепті шаңырақ көтеру тіркесі дербес отбасының құрылуын, ұрпақ сабақтастығын білдіретін қасиетті ұғымға айналған. Демек Шаңырақ күні тек бір отбасының емес, тұтас ұлттың бірлігін айшықтайтын мереке.
Қазір де отбасы құндылығы өз маңызын жоғалтқан жоқ. Жаңартылған Конституцияның 30-бабында «Неке және отбасы, ана, әке мен бала мемлекет қорғауында болады» деп нақты көрсетілген. Сондай-ақ неке – ер мен әйелдің заңға сәйкес тіркелген ерікті әрі тең құқықты одағы екені белгіленген.
Отбасы институты – қоғамның ең негізгі және маңызды әлеуметтік құрылымдарының бірі. Ол ер мен әйелдің заңды некеге негізделген одағы арқылы қалыптасып, ұрпақ тәрбиелеу, құндылықтарды сақтау және қоғамның тұрақтылығын қамтамасыз ету қызметін атқарады. Отбасы адамға алғашқы тәрбие мен өмірлік бағыт беретін орта болып саналады. Отбасы институтының берік болуы – қоғамның дамуы мен ұлттың болашағы үшін маңызды.
Шаңырақ күні отбасы қадірін ұлықтап, қоғамдағы бірлік пен тұрақтылықтың негізі – берік отбасы екенін тағы бір мәрте еске салады.
