Шығыс Қазақстан облысының Бұқтырма су қоймасы жағалауында заңсыз салынған демалыс базалары анықталды, деп хабарлайды F16.kz.
Алтай ауданы әкімдігінің хабарлауынша, заңсыз құрылыстардың бәрі Мохнатка тауының етегіндегі жағалауда орналасқан. Жуықта кезекті рет тексеруге шыққан аудан әкімі аталған аумақта болып, демалыс базасының иелерімен сөйлесті. Кездесуде кәсіпкерлер қоқыс шығару, қатты тұрмыстық қалдықтар тастайтын жәшіктерді орнату және оларды күтіп ұстау, санитарлық-гигиеналық тораптарды тарту сияқты мәселелерді көтерді.
Аудандық сәулет, қала құрылысы және құрылыс бөлімінің ақпаратына сүйенсек, Бұқтырма су қоймасы жағалауында жүргізілген мониторинг нәтижесінде Махнатқа тауы маңында заңсыз құрылыс жүргізген, яғни әркім өз бетімен демалыс базасын соғып алған 18 учаске анықталды.
Қала құрылысы заңнамасының бұзылғаны анықталды, материалдар мемлекеттік сәулет-құрылыс бақылау мекемесіне жіберілді. Меншік иесі анықталып, оларға тиісті шара қолданылады. Бұл аумақта құрылыс нысандары көп салынып жатқандықтан жағдайды тұрақты бақылауда ұстау маңызды, – деді Алтай ауданының әкімі Ринат Құрмамбаев.
