Былтыр Өскеменде тұрғын үй кезегінде тұрған, баспанаға мұқтаж бірде—бір көпбалалы ана пәтер алмаған. Бұл туралы 8 наурыз – Халықаралық әйелдер күні мерекесіне орай қала әкімімен болған кездесуде айтылды, деп хабарлайды F16.kz.
Көпбалалы аналардың ең басты мәселесі – баспана. Менің білуімше, былтыр қалада тұрғын үй кезегінде тұрған бірде-бір көпбалалы ана үй алған жоқ. Әрине, мұқтаж адамдарға мемлекеттен үй беру тәртібі өзгерді, оны біліп отырмыз. Дегенмен қала әкімдігі биыл аналарымызды бірінші кезекте ескерсе екен деген тілегіміз бар, – деді мерекелік кездесуге келген аналар.
Өскемен әкімі Алмат Ақышов бұл мәселенің мән-жайын түсіндірді.
Былтырдан бастап тұрғын үй кезегін қадағалау, беру қызметі «Отбасы банкке» өтті. Статистикаға қарасам, мұқтаж отбасыларына тапсырылатын баспаналар саны жыл сайын өсіп отыр. Тек былтыр нөл деп тұр. Негізі нөл емес. Біз 2025 жылы 160-тай пәтер сатып алдық және оларды «Отбасы банкке» өткіздік. Ал банк жүйенің ауысуына байланысты әлі тапсыра алмай жатыр. Сондықтан бірде-бір үй берілмеген болып тұр. Енді ол пәтерлер биыл беріледі, – деді қала әкімі.
