Биылғы 24 қаңтарда Өскемендегі Шығыс Қазақстан облыстық филармониясында «Дала сарыны» атты бірлескен этнофольклорлық концерт өтеді. Кеште қазақ өнерін халықаралық деңгейде танытып жүрген «Барқытбел» этноансамблі мен түркі халықтары мәдениетінің жұлдызы саналатын, әлемге әйгілі TURAN этнофольклорлық ансамблі өнер көрсетеді, деп хабарлайды F16.kz.
«Барқытбел» этно ансамблі – қазақтың көне музыкалық мұрасын жаңғыртып, дәстүрлі өнерді заманауи форматта насихаттап жүрген шығармашылық ұжым. Ансамбль домбыра, сыбызғы, шаңқобыз, сазсырнай, шертер, жетіген, қылқобыз, шіңкілдек секілді ұлттық аспаптарды кеңінен қолданады.
Өнер ұжымы 2023–2024 жылдары «QYZYLJAR FEST» (Петропавл), «КӨШПЕНДІЛЕР-2023» халықаралық фестивалі (Ұланбатыр, Моңғолия), «Алтай – түркі әлемінің алтын бесігі» (Катонқарағай), сондай-ақ Қытайдың Тайюань қаласында өткен «GANNAT» дүниежүзілік фестивалінде өнер көрсетіп, қазақтың төл өнерін халықаралық сахнада танытты. Бүгінде ансамбль өңірде этно музыка бағытында өзіндік стиль қалыптастырып келеді.
Бұл күні әлемге әйгілі «TURAN» этноансамблімен бір сахнада тарбағатайлық «Барқытбел» ұжымы өнер көрсетеді. Бұл шалғай өңірден шыққан ансамбльдің қазақ өнеріндегі ерекше орнын айқындайды.
«Дала сарыны» концертінде көрермендер қазақтың дәстүрлі ән-күйін, заманауи этнотуындыларды, Кетбұғаның әйгілі «Ақсақ құлан» күйін, Доспамбет жыраудың ХVI ғасырдағы «Айнала бұлақ бас Тең» толғауын, сондай-ақ ансамбльдердің авторлық шығармалары – «Алтай, Алтай, Алтын-Тау», «Дала сарыны», «Ер Тұран», «Ұлы Тұран – мәңгілік» туындыларын тыңдай алады.
