Мәжіліс депутаттары Бақытжан Базарбек пен Мұрат Әбенов Бас прокуратурадан дәрілік заттардың бірыңғай дистрибьюторы – «СК-Фармация» ЖШС, «Медсервис-Плюс» фармацевтикалық компаниясы, Дәрілік заттарды сараптау ұлттық орталығы, Медициналық және фармацевтикалық бақылау комитетінің қызметіне қатысты ауқымды прокурорлық тексеру жүргізуді сұрады, деп хабарлайды F16.kz.
Біз прокуратура органдары тарапынан фармацевтикалық салаға ауқымды тексеріс жүргізіледі, құқық қорғау органдары тарапынан сотқа дейінгі тергеулер, сондай-ақ қамауға алу және сот процестері болады деп ойлаймыз, – деп жазды Базарбек Facebook-тегі парақшасында.
Депутаттар арызды Жоғары аудиторлық палатаның «халықты дәрі-дәрмекпен қамтамасыз ету» туралы баяндамасы негізінде жазды.
Аудиторлық қорытындыға сәйкес, «СК-Фармация» ЖШС дәрілік заттар мен медициналық бұйымдарды нарықтағы бағадан 40%-дан 365%-ға дейін жоғары бағамен сатып алған, – деп жазылған депутаттардың өтінішінде.
Олар бірыңғай дистрибьютор тарапынан жүргізіліген «сапасыз жоспарлау» салдарынан медициналық ұйымдар жалпы сомасы 2,8 млрд теңгеге дәрі-дәрмектен бас тартқанын атап өтеді. Ал логистика, есеп және шығындарды бақылау жүйелерінің автоматтандырылмауы 17,2 млрд теңге көлемінде бюджет шығындарына әкеп соққан.
Компания бірыңғай оператор ретінде жалғыз жеткізушіні өзі таңдап алып, Дәрілік заттарды сараптау ұлттық орталығымен бірлесіп, дәрілік заттарға жүргізілетін сараптаманы әдейі созу арқылы мүмкін бәсекелестерді «ойыннан шығарған», – деп жазады депутаттар.
Олардың мәліметінше, «таңдаулы» жеткізушінің өтінімдері небәрі 25 күнде қаралған, ал олардың бәсекелестері сараптама нәтижесін 1270 күнге дейін күткен.
Бұдан бөлек олар дәрілік өнімдерді сертификаттау және импорттау салаларында «көлеңкелі және жемқорлық схемалардың» бар екенін көрсетті.
Депутаттар Жоғары аудиторлық палата есебінде келтірілген деректер негізінде сотқа дейінгі тергеу бастауға шақырды.
