Шығыс Қазақстан облысында құтқарушылар шалғайдағы ауыр науқасқа көмек көрсету үшін санитарлық авиацияны пайдаланды. Алтай ауданының жетуі қиын таулы аймағында орналасқан омарта шаруашылығынан науқас ауруханаға аман-есен жеткізілді, деп хабарлайды F16.kz.
1964 жылы туған ер адамға шұғыл медициналық көмек қажет болған. Оны жедел жеткізу үшін Қазақстан Төтенше жағдайлар министрлігі авиациясының тікұшағы жұмылдырылды. Әуе кемесінің бортында Апаттар медицинасы орталығы мамандары мен құтқарушылар болған. Ұшақты тәжірибелі ұшқыштар — Сергей Пинигин, Олег Алфеев және Айдар Мамырханов басқарды. Олар қарапайым көлік жүріп бара алмайтын, жер жағдайы қиын таулы аймақты еңсеріп, оқиға орнына жылдам жетті. Дәрігерлер науқасты қараған соң тікұшақпен дереу кері ұшты. Тікұшақта пациенттің жағдайы Апаттар медицинасы орталығы мамандарының тұрақты бақылауында болды. Ер адам Алтай қаласындағы медициналық мекемеге жеткізіліп, әрі қарай ем қабылдауға жатқызылды.
