Қазақтың мақтанышы, әлемге танымал әнші Димаш Құдайберген 2025 жылы өзінің шығармашылық жолындағы жаңа белестерге қадам баспақ. Ол алғаш рет Нью-Йорктегі атақты Madison Square Garden сахнасында өнер көрсетіп, Испанияда жеке концерт береді, деп хабарлайды F16.kz.
ӘЙГІЛІ АРЕНАДА ӘН САЛАДЫ
Биылғы қазанда Димаш Нью-Йорктегі ең әйгілі алаңдардың бірі – Madison Square Garden сахнасында жеке концерт қояды. Бұл – көптеген әлемдік жұлдыздар өнер көрсеткен тарихи сахна. Бұл концерт оның халықаралық деңгейдегі мәртебесінің тағы бір дәлелі болмақ.
Көрермендер бұл кеште Димаштың Stranger шоуын тамашалай алады. Концерт жаңалығы Алматыда өткен фан-кездесу кезінде ресми түрде жарияланды. Жанкүйерлер бұл жаңалықты үлкен қуанышпен қабылдады.
ИСПАНИЯДАҒЫ ТҰҢҒЫШ КОНЦЕРТІ
Биылғы 8 қарашада, Димаш Испаниядағы Олимпик аренада жеке концерт өткізеді. Бұл оның Испаниядағы алғашқы жеке концерті болмақ. Әнші бұл кеште тіпті испан тілінде ән шырқайтынын айтты. Бұл жаңалықты ол испандық La Voz de Galicia басылымына берген сұхбатында жария етті. Испандық фанаттар концертке ерекше қызығушылық танытып отыр, ал билеттер сатылымға түскен сәтте бірден өтіп кетуі мүмкін.
Жаңа әуен туғанда мен бірден оның мәтінін, бейнебаянын, сахналық тұжырымдамасын елестетемін. Аранжировкаға қосылатын аспаптардың үнін естимін. Егер өз жолыңмен жүріп, идеяңды іске асырғың келсе барлық кезеңге қатысу қажет, – деді Димаш.
