Елімізде алаяқтықтың жаңа түрлері көбейіп барады. Бұл туралы Қаржылық мониторинг агенттігі ескерту жасады. Алаяқтар енді агенттіктің ресми өкілінің атын жамылып, жалған (дипфейк) видеолар таратып жүр, деп хабарлайды F16.kz.
Мұндай видеоларда «инвестор» ретінде көрсетілген адамның ойдан шығарылған оқиғасы айтылады. Сценарий бойынша, ол ақша салып, табысы өсіп жатқанын көреді. Бірақ кейін қаржыны шешіп алу үшін түрлі сылтаумен – комиссия, салық немесе «тексеру» үшін төлем жасау талап етіледі. Адам бірнеше рет ақша аударғанымен, соңында қаражатына қол жеткізе алмай қалады. Бұдан кейін алаяқтар «ақшаны қайтаруға көмектесеміз» деп сендіреді. Пайдаланушыны арнайы сілтеме арқылы «халық заңгері» деген чатқа бағыттайды. Онда жалған хат алмасулар көрсетіліп, қаражатты қайтару мүмкін сияқты әсер қалдырылады.
Сонымен қатар алаяқтар агенттік атынан жалған сайттар ашқан. Бұл сайттарда «жәбірленушілерге ақша қайтарып береміз» деген ақпарат жариялаған.
Сілтемеге өту кезінде пайдаланушылардан сауалнама толтыру сұралады Мысалы, «ақшаңызды қашан жоғалттыңыз?» деген сұрақ қойылуы мүмкін. Кейін жеке мәліметтер — аты-жөні, телефон нөмірі, электронды пошта енгізіліп, «қайтару процесін бастау» батырмасын басу ұсынылады. Алайда мұның бәрі – алаяқтардың айласы. Негізгі мақсаты – азаматтардың жеке деректерін алып, ақшасын иемдену, – деп хабарлады ҚМА баспасөз қызметі.
Мамандар мұндай сайттар мен сілтемелерге сенбеуге кеңес береді. Күмәнді ақпаратты міндетті түрде тексеру қажет. Ол үшін Қаржылық мониторинг агенттігіне немесе тұрғылықты жердегі экономикалық тергеп-тексеру департаментіне жүгінуге болады.
Агенттік азаматтарды барынша сақ болуға, ақпаратты тек ресми дереккөздерден алуға және күмәнді ұсыныстарға алданбауға шақырады.
