Бүгін, 20 қыркүйек – Дүниежүзілік тазалық күні Шығыс Қазақстан облысында ауқымды экологиялық акция өтті. Игі бастама аясында 113 мың түп сібір шыршасының көшеті егіліп, тонналап қоқыс жиналды, деп хабарлайды F16.kz.
Тазалық күні бүкіл облысты қамтығанмен негізгі шара Өскеменнің Шмелов Лог ауылы маңында ұйымдастырылды. Бұл жер тегін таңдап алынған жоқ, мұнда қаланың қоқыс полигоны орналасқан. Қолқаны қапқан күлімсі иіс, айнала шашылған целлофан пакеттер, ескі-құсқы тұрмыстық заттар, тау боп үйілген қоқыс қорқынышты һәм аянышты көрінеді. Бетперде тағып, қолына қолғап киген белсенді жастар “ұрыста тұрыс жоқ” дегендей іркілмей іске кірісіп кетті. Қаладағы мемлекеттік мекемелердің, кәсіпорындар мен қоғамдық ұйымдардың өкілдері эковолонтерлермен тізе қосып жиыны 300-ден аса қатысушы қоқыс полигонынан Өскемен-Алтай трассасына дейінгі аралықты сүзіп шықты. Тіркеме ілген тракторлар бірінен кейін бірі келіп, қапқа салынған қоқысты тиеп алып кетіп жатты.
Бүгін бүкіл әлемде миллиондаған адам сенбілікке шығып, табиғатты қорғауға атсалысып жатыр. Бұл бастамаға біздің облыс та үлес қосып, еріктілер, студенттер, жұмысшы жастар бар жиыны 300-ден аса адам ортақ іске жұмылдырылды. Бір айта кететіні, жастардың бәрі өз еркімен келіп қатысып жатыр, оларды ешкім мәжбүрлеген жоқ. Бұл әлбетте қоғамның экологиялық мәдениетінің артып келе жатқанын көрсетеді, – деді облыстық экология департаментінің баспасөз хатшысы Аружан Мұсаханова.
Глубокое ауданының Мало-Уба орман шаруашылығы аумағында өткен экоакция аясында табиғат жанашырлары 113 мың түп сібір шыршасының көшетін отырғызды.
Жалпы облыс бойынша тазалық күніне шамамен 1 мыңнан астам адам қатысты. Олардың ішінде мемлекеттік органдар мен кәсіпорындардың қызметкерлері, оқушылар, студенттер, ұкіметтік емес ұйымдардың өкілдері, еріктілер және белсенді қала тұрғындары бар.
Экология және табиғи ресурстар министрлігі шара қорытындысын Қазақстан рекордтар кітабы – «ҚАЭА»-ға енгізуге өтінім берді.
Дүниежүзілік тазалық күні жыл сайын 190-нан астам елді біріктіреді, ал Қазақстан бұл бастаманы дәстүрлі түрде белсенді қолдап келеді.
