10-12 тамыз аралығында облыс аумағында жол ережесін бұзудың 988 фактісі тіркелген. Оның басым бөлігі қауіпсіздік белдігін тақпағандар мен көлік жүргізу кезінде телефон пайдаланғандар, деп хабарлайды F16.kz.
Шығыс Қазақстан облысында «Қауіпсіз жол» жедел профилактикалық іс-шарасы қорытындыланды.
Іс-шара барысында көлік құралын масаң күйде басқарған 15 жүргізуші ұсталды. Тағы 11 жүргізуші қарсы қозғалыс жолағына шыққан.
Жиі кездесетін құқықбұзушылықтардың қатарында көлік басқару кезінде телефон пайдалану – 273 дерек және 388 қауіпсіздік белдігін тақпау дерегінің жолы кесілді. Бұл ең көп таралған құқықбұзушылықтардың бірі болып саналады және жүргізушілер мен жолаушылардың қауіпсіздігіне тікелей әсер етеді. Сондай-ақ жүргізуші куәлігі жоқ 30 адамның көлік жүргізгені және мұндай құқықтан айырылған 5 жүргізушінің қайта көлік басқарғаны анықталып, шара қолданылды. 75 көлік құралы, оның ішінде мотоцикл мен электрвелосипедтер арнайы тұраққа қойылды, — дейді ШҚО ПД баспасөз қызметі.
ШҚО Полиция департаменті жүргізушілерді жол жүрісі қағидаларын сақтауға, көлік тізгінінде мұқият болуға және жолдағы қауіпсіздік әрбір жол қозғалысына қатысушыға байланысты екенін есте сақтауға шақырады.
