Риддер қалалық соты экологиялық құқықбұзушылық жасағаны үшін жергілікті компанияны әкімшілік жауапкершілікке тартып, 1,9 млн теңге айыппұл салды, деп хабарлайды F16.kz порталы Жоғарғы соттың баспасөз қызметіне сілтеме жасап.
Сонымен қатар заң бұзған жауапкершілігі шектеулі серіктестік үш ай мерзімге жұмысын тоқтатты.
Шығыс Қазақстан облысы Риддер қаласының тұрғындары уәкілетті органға ЖШС-нің экологиялық құқық бұзушылықтарына қатысты шағыммен жүгінген.
Жоспардан тыс жүргізілген тексеру нәтижесінде ЖШС жалға алған аумақта өндірістік қалдықтарды өңдеуге арналған зауыт құрылысына дайындық аясында дәнекерлеу және жер қазу жұмыстарын жүргізгені анықталды. Қоршаған ортаға эмиссиялар (шығарынды) бойынша рұқсат құжаттары болмаған. Бұл Экологиялық кодекстің 106-бабын және ӘҚБтК-нің 328-бабы 4-бөлігінің талаптарын бұзу болып саналады. – делінген хабарламада.
Компанияның атқарушы директоры сотта арбаларға дәнекерлеу жұмыстары ғана жүргізілгенін, жер қазу болмағанын, тек аумақ тазартылғанын айтты. Сонымен қатар ол аталған жерде қызметтің тоқтатылғанын және жұмыстарды өнеркәсіптік аймақтағы басқа учаскеге көшіру жоспарланғанын атап өтті.
Экологиялық рұқсат болмағанын ЖШС өкілі жоққа шығармады. Тәуелсіз экологтың айтуынша, дайындық жұмыстарының қоршаған ортаға антропогендік әсері болады және ондай жұмыс рұқсатты талап етеді.
Әкімшілік құқық бұзушылық туралы кодекстің 328-бабы 4-бөлігіне сәйкес, экологиялық рұқсатсыз антропогендік әсер ету орта және ірі кәсіпкерлік субъектілеріне 200% мөлшерінде алынған экономикалық пайдадан айыппұл салуға, сондай-ақ 3 жыл мерзімге қызметін тоқтатуға әкеп соғады, — деп хабарлады Жоғарғы соттың баспасөз қызметі.
Сот тексеру актілері мен тұрғындар ұсынған фотоматериалдарды зерттей келе, құрылыс-монтаж жұмыстарының басталғанын және қоршаған ортаға теріс әсердің болғанын анықтады.
Үкім заңды күшіне енген жоқ.
