Қазақстанда экономикалық өсім кейінгі 10 жылдағы ең жоғары көрсеткішке жетті. Бұл туралы Қазақстан Республикасы Президентінің көмекшісі – Баспасөз хатшысы Руслан Желдібай жазды, деп хабарлайды F16.kz.
2025 жылдың қорытындысы бойынша экономикалық өсім 6 пайыздан асады деп күтіледі. Бұл – соңғы он жылдағы ең жоғары көрсеткіш. Қазақстан тарихында тұңғыш рет ішкі жалпы өнім көлемі 300 миллиард доллардан асады. Ол жан басына шаққанда 15 мың доллардан келеді, — деп жазды Руслан Желдібай Telegram парақшасында.
Сонымен қатар ол елімізде жалпы құны 1478,1 миллиард теңге болатын185 жоба пайдалануға берілгенін, 22,8 мыңнан астам тұрақты жұмыс орны ашылғанын атап өтті.
Жобалардың барлығы толық қуатына көшкен кезде экономикаға айтарлықтай серпін бермек. Ал өндіріс көлемі 2,3 триллион теңгеге жуықтайды.
2025 жылы Президент Достық – Мойынты темір жолының екінші желісін, Қостанай облысындағы KIA Qazaqstan автокөлік зауытын іске қосты.
Сонымен қатар Мемлекет басшысы Шымкент және Қызылорда әуежайының жаңа терминалдарын аралап көріп, Астанадағы Stadler Kazakhstan зауыты шығарған алғашқы жолаушылар вагонымен танысты.
Бұдан бөлек, қара және түсті металлургия, химия, целлюлоза-қағаз, жеңіл және тағам өнеркәсібінде, құрылыс индустриясында бірқатар жоба іске қосылды, — деді ҚР Президентінің Баспаөз хатшысы.
