Күні кеше Шығыстың бас шаһарында ел дамуына елеулі үлес қосып жүрген бір топ азаматқа құрмет көрсетілді. Президент Қасым-Жомарт Тоқаевтың Жарлығымен елдің әлеуметтік-экономикалық және мәдени-рухани дамуына қосқан үлесі үшін жылдар бойғы ерен еңбегімен көзге түскен әр саланың мамандары мемлекеттік марапаттарға ие болды, деп хабарлайды F16.kz.
Олардың қатарында журналистиканың қазанында қайнап, мемлекеттік қызметте орасан зор еңбек сіңіргендер мен кәсібін дөңгелетіп, өңір экономикасының өрге басуына үлес қосып жүрген жерлестеріміз бар. Жоғары марапатты облыс әкімі Нұрымбет Сақтағанов табыстады.
Бүгін марапатқа ие болған әр азамат өз саласында адалдықтың, жоғары жауапкершіліктің, туған жерге деген сүйіспеншіліктің үлгісін көрсетіп келеді. Бұл – көп жылғы еңбектің, тәжірибе мен табандылықтың нәтижесі. Сіздердің және әріптестеріңіздің арқасында өңіріміздің бүгіні мен болашағы қалыптасып, өркендеп келеді. Бүгінгі марапат сіздерді жаңа белестерге жетелейтініне сенемін. Әрқайсыңызға еткен еңбек, маңдай тер үшін зор алғыс білдіремін, — деді аймақ басшысы.
Президент Жарлығына сәйкес «Парасат» орденімен Шығыс Қазақстан облыстық мәдениет, спорт, туризм және ақпарат қызметкерлерінің салалық кәсіптік одағы филиалының төрағасы Түсіпхан Түсіпбеков марапатталды.
Мен отыз жыл өмірімді осы мемлекеттік қызметке арнадым. Қазір зейнетке шықсам да, бойыма сіңген мемлекетшілдік қасиет ешқашан жоғалмайды. Аттан түссем де қатардан қалған жоқпын. Қоғамға аз да болса пайдамызды тигізейін деген ниетпен қоғамдық бірлестіктерде еңбек етіп келемін. Жылдар бойы қай салада болмасын еткен еңбегімнің бағаланғанына ризамын, — деді Түсіпхан Түсіпбеков.
Ал «Құрмет» орденіне «Ореол Ltd» ЖШС директоры Сергей Коротин ие болды. 1990 жылы кәсіпкерлік саласына аяқ басқан ол бүгінде өңірдің дамуына өз үлесін қосып келеді.
Шынымда айтсам, толқып тұрмын. Мұндай мемлекеттік наградаға ие боламын деп ойлаған жоқпын. Мен өз ісіме адал болуға, жауапкершілікпен қарауға тырыстым. Қазір сол еңбектің нәтижесін қолыма алғандай болдым, — деді кәсіпкер.
Сондай-ақ бірқатар азамат «Ерен еңбегі үшін» медалімен марапатталды. Олардың қатарында «Қазақстан» РТРК» АҚ Шығыс Қазақстан облыстық филиалының директоры Берік Көшербаев бар.
Мен журналистика саласында жиырма жылдан астам уақыт еңбек етіп келемін. Еңбек жолым университет қабырғасында оқып жүргенде басталды. Біз – журналистер отбасымыз. Осы жолда үнемі қасымнан табылған отбасымның да, менімен бірге бірлесе еңбек етіп келе жатқан ұжымның да еңбегі ақталды деп білемін. Алдағы уақытта да осы марапатқа лайық болу үшін еңбек етеміз, – деді ол.
