Бүгін, 25 қазанда Өскеменнің «Алтай» көтерме-бөлшек сауда орталығы аумағында кезекті ауыл шаруашылығы өнімдерінің жәрмеңкесі өтті. Бұл жолғы жәрмеңке Республика күні мерекесіне орай ұйымдастырылғандықтан көпшілікке ұсынылған азық—түліктің бағасы нарықтағыдан әлдеқайда төмен болды, деп хабарлайды F16.kz.
Катонқарағайдың балы мен қымызы, Тарбағатайдың еті, Зайсанның тарысы, Ұланның сүті, Глубокое мен Алтайдың бақша өнімдері молынан саудаланды. Базаршылап келген қалың жұрт мерекелік жеңілдікпен сатылған арзан азық-түлікті түске дейін-ақ түгесіп тастады.
Ет алдық 25 келідей. Қазір картоп, пияз, сәбіз сатып аламыз. Сенбі сайын келеміз. Бағасы көңілге қонымды. Бүгін мерекеге байланысты тағы да түсіріпті бағаны. Cиыр етінің келісін 3000-3200 теңгеден сатып жатыр, семіз екен. Жаңа сойылған жас малдікі. Жалпы, біз сияқты жалғыз зейнетақыға күн көріп отырған қарияларға ет пен сүтке жеңілдік жасаса жақсы болар еді. Әйтпесе қазір бәрі қымбат, түкке жетпейді. Әйтеуір жәрмеңкеден керек дүниемізді саудаласып, түсіртіп аламыз. Соған шүкір, – деді Күршім ауданынан көшіп келген Өскемен тұрғыны, зейнеткер Гүлжамал Нұрсолтанқызы.
Гүлжамал қария сияқты ет алған елдің қарасы көп болды бұл күні. Қыр астында қылышын сүйретіп қыс келе жатыр. Соғым уақыты таяп қалды. Күзгі семіз малдың етін қолайлы бағада ұсынып тұрғанда неге алмасқа? Мұндай мүмкіндік бола бермейді.
Мерекелік жәрмеңкені ұйымдастырған Өскемен қаласы әкімдігінің өкілдері бұл күні азық-түліктен бөлек халыққа қажетті басқа да тауарлар жеңілдікпен сатылып жатқанын айтты. Мәселен, Сауда және интеграция министрлігінің «Republic Day» ауқымды сауда акциясы аясында азық-түлік емес тауарларға 10%-дан 70%-ға дейін жеңілдіктер қарастырылды. Оның ішінде киім, аяқ киім, тұрмыстық техника, жиһаз, үйге, жөндеуге және құрылысқа арналған тауарлар төмендетілген бағада саудаланды. Арзандатылған тауарлар «ТНП» құрылыс дүкенінде, «Фараон» жиһаз салонында және басқа да сауда орындарында ұсынылды.
