Энергетика министрлігі «Электр энергиясына шекті тарифтерді бекіту туралы» бұйрық жобасын жариялады. Жоба ашық талқылауға ұсынылды, деп хабарлайды F16.kz.
Бұл ретте, электр энергиясына қолданыстағы шекті тарифтер Қазақстан Республикасы Энергетика министрінің 2018 жылғы 14 желтоқсандағы № 514 бұйрығымен 2019-2025 жж бекітілген. Осыған байланысты, 2026-2032 жылдарға арналған жеті жылдық мерзімге электр энергиясына шекті тарифтерді бекіту қажет, – делінген түсіндірмеде.
Энергетика министрлігі биылғы 8 қазанда Мемлекет басшысының төрағалығымен макроэкономикалық теңгерімсіздіктер және инфляциялық тәуекелдер мәселелері бойынша кеңес өткізілгенін, оның қорытындысы бойынша макроэкономикалық тұрақтылық жөнінде шаралар қабылдау тапсырылғанын атап өтті. Осыған байланысты, электр энергиясына шекті тарифтердің өсуін тоқтату туралы шешім қабылданған.
Осы бұйрықпен 2026-2032 жылдарға арналған электр энергиясына шекті тарифтерді 2025 жылғы электр энергиясына шекті тарифтер деңгейінде бекіту көзделген. Бұл ретте, шекті тарифтерді 2026-2032 жылдарға бекіту шекті тарифтердің 2025 жылғы деңгейінде бекітілуіне байланысты бірыңғай сатып алушының бағасына әсер етпейтінін атап өту қажет, – деп хабарлады Энергетика министрлігі.
Бекітілген тарифтерді 2026 жылғы 1 қаңтардан бастап қолданысқа енгізу көзделген. Шекті тарифтердің қолданылу кезеңі 2026-2032 жылдар деп белгіленген.
Құжат «Ашық НҚА» порталында 17 желтоқсанға дейін талқыланады.
