Бүгін Қазақстанда Қазақ тазысы күні алғаш рет аталып өтеді. Дәл осы күні, 2024 жылғы 3 қыркүйекте, Халықаралық кинологиялық федерация (FCI) қазақ тазысын алдын ала танып, №372 халықаралық стандартын бекітті. Қазақстан тұқымның шыққан елі ретінде танылды.
Ғасырлар бойы Ұлы даламен бірге жасасқан тазы бүгінде әлемдік көрмелерде Қазақстанды танытып жүр.
Қазір Бірыңғай асыл тұқымдық кітапта 4 мыңға жуық тазы тіркелген. Алда үлкен жұмыс бар. Тазының генетикалық қорын, табиғи және жұмыс қасиеттерін сақтап, ұлттық тұқымды келесі ұрпаққа жеткізу – басты міндет, — делінген ҚР Экология және табиғи ресурстар министрлігінің хабарламасында.
Қазақ тазысы – Ұлы даладан жеткен асыл мұра. Жаңа мерекенің пайда болуы ұлттық тұқымдарға деген қызығушылықты арттырып қана қоймай, олардың тұқымдық ерекшеліктерін сақтауға, көбейтуге және халықаралық деңгейде танытуға мүмкіндік береді.
