Елімізде мүгедектігі бар адамдарға арналған арнайы вагондар іске қосылады. Бұл туралы Үкімет отырысында көлік министрі Ерлан Сауранбаев айтты, деп хабарлайды F16.kz.
Ведомство басшысының мәлімдеуінше, инклюзивті саясат тұжырымдамасы аясында көлікке қолжетімдікті қамтамасыз ету үш негізгі бағыт бойынша жүріп жатыр. Олар: инфрақұрылым, көлік және қызмет көрсету.
Бүгінде жолаушылар вагондарының шамамен 90 пайызы арнайы көтергіш құрылғылармен және бейімделген купелермен жабдықталған. Ал алдағы уақытта бұл бағыттағы жұмыс күшейтіліп, 2030 жылға дейін әрбір пойыз құрамына кемінде бір арнайы вагон енгізу жоспарланып отыр.
Сонымен қатар вокзал инфрақұрылымын жаңғырту аясында да бірқатар өзгеріс қолға алынған. Атап айтқанда, жолаушыларға ыңғайлы болу үшін пандус, лифт және көтергіш құрылғылар орнатылып, касса аймақтары мен санитарлық тораптар жаңартылып жатыр.
Жолаушыларға ұсынылатын әлеуметтік қолдау шаралары да сақталған. Қазір мүмкіндігі шектеулі азаматтар теміржол билеттерін 50 пайыз жеңілдікпен сатып ала алады. Бұдан бөлек арнайы купелерге билетті онлайн рәсімдеу мүмкіндігі қарастырылған.
Ведомство дерегіне сәйкес, 2025 жылдың қорытындысында пойыз қызметін пайдаланған мүмкіндігі шектеулі жандар саны 580 мыңға жеткен.
