Елімізде ең көп жол-көлік оқиғасы болатын аймақтар анықталды, деп хабарлайды F16.kz.
Астанадағы Орталық коммуникациялар қызметінде өткен брифингте академик Н.Батпенов атындағы Ұлттық травматология және ортопедия ғылыми орталығының директоры Олжас Бекарысов еліміздегі жол-көлік оқиғаларының 55%-ы алты өңірдің үлесіне тиесілі екенін мәлім етті.
Оның айтуынша, былтыр әр 100 мың адамға шаққанда 12,2 адам жол апатынан қаза тапқан. Бұл 2023 жылмен салыстырғанда 8,6%-ға төмен. Жалпы, былтыр 2452 адам жол-көлік апатынан қайтыс болған.
Өкінішке қарай жол апатынан болатын өлім-жітім бойынша Қазақстан Экономикалық ынтымақтастық және даму ұйымына (ЭЫДҰ) мүше елдерден артта қалып отыр. Жапонияда бұл көрсеткіш ең төмен деңгейде, Еуропа елдерінде де жағдай салыстырмалы түрде әлдеқайда жақсы, – деді Бекарысов.
Бас прокуратураның дерегінше, былтыр тіркелген жол-көлік оқиғалары 2023 жылмен салыстырғанда 98,9%-ға артып, 15 886-ға жеткен. Бұл өсімнің негізгі себебі ретінде былтырдан бастап жол апатына түскен әрбір адам денсаулығына зиян келсін-келмесін статистикаға енгізіле бастағаны атап өтілді. Бұған дейін тек нақты жарақат алғандар есепке алынатын.
Қазіргі таңда еліміздегі жол апаттарының жартысынан астамы Алматы, Астана, Шымкент қалаларында, Алматы, Жамбыл, Ақтөбе облыстарында болған. Былтыр 40 873 адам жарақат алған, 2452 адам көз жұмған. 2015 жылдан 2020 жылға дейінгі аралықта елдегі жол-көлік оқиғалары біртіндеп азайғанымен 2020-2023 жылдары өсім байқалды. Ал былтыр бұл көрсеткіш күрт өсті, – деп қосты орталық директоры.
