Биылғы оқу жылы басталғанда Шығыс Қазақстан облысында бірнеше жаңа мектеп есігін айқара ашады. Өскеменнің өзінде үш білім ұясының лентасы қиылады, деп хабарлайды F16.kz.
Облыс орталығында «Келешек мектептері» жобасы аясында бой көтерген №31, №40, №41 мектептері алғаш рет оқушыларын қабылдайды.
Сонымен қатар заманауи үлгіде салынып, жасақталған жаңа білім ордалары Глубокое ауданының Белоусовка кентінде және Опытное поле ауылында, Зайсан қаласында ашылады.
Өңірдегі барлық 319 мектептің асханасы жөнделді. Әр аудан мен қалада оқушылар ішетін тамақтың сапасын бақылайтын арнайы топтар жұмыс істейді. Бүгінде Қазақстандағы ең үздік 100 мектептің бірі ретінде Ұлан ауданының Бозанбай орта мектебі аталып отыр. 1964 жылы салынған бұл мектеп бес жүзден астам оқушыға лайықталған, қазір мұнда 270 бала оқиды, – деп атап өтті облыс әкімі.
Былтыр мектепке 271,5 млн теңге бөлініп, күрделі жөндеу жүргізілді. Кейін «Қазақстан халқына» қоры тағы 250 млн теңге бөліп, материалдық-техникалық базасы толық жаңартылды. Мұнда 30 оқу кабинеті, коворкинг аймақтары, жаңа спортзал, кітапхана, теле және арт-студиялар, STEM-зертхана, заманауи жабдықталған акт залы бар.
