Аудандық ауруханадан тиісінше медициналық көмек ала алмаған Шемонаиха ауданының тұрғыны сотқа жүгінугк мәжбүр болған, деп хабарлайды F16.kz.
Сот талап қоюшыға медициналық көмек дұрыс көрсетілмегенін анықтады.
Науқастың жағайын дұрыс бағаламай, еңбекке уақытша жарамсыздық парағын беруден бас тартқан, тексеру мен медициналық құжаттама толық жүргізілмеген, қажетті тексерулер мен емдеуге жолдама берілмеген және уақытында диспансерлік есепке қойылмаған. Аталған жағдайдың бәрі әлеуметтік медициналық сақтандыру қоры жүргізген мониторинг нәтижелерімен расталып, оның қорытындысы бойынша медициналық ұйымға қаржылық санкциялар қолданылған, — дейді облыстық соттың баспасөз қызметі.
Ұсынылған материалдарды зерделей отырып, сот қойылған талаптарды ішінара қанағаттандыруға негіз бар деген қорытындыға келді. Сондай-ақ талап қоюшының бастан кешкен моральдық күйзеліс деңгейін, ауыр зардаптардың болмауын ескере отырып медициналық ұйымнан моральдық зиян мен материалдық шығын ретінде 151 617 теңге және 21 357 теңге мөлшерінде сот шығындарын өндіріп алуға үкім шығарды.
Шешім заңды күшіне енді.
