Елімізде қаржылық операциялардың ашықтығы мен қауіпсіздігін арттыруға бағытталған шаралар енгізілмек. Бұл туралы Қаржылық мониторинг агенттігі төрағасының орынбасары Қайрат Бижанов бүгін өткен Үкімет отырысында мәлім етті, деп хабарлайды F16.kz.
Оның айтуынша, енді басқа біреудің банк картасына 500 мың теңгеден астам сома аударғанда ақша жіберуші өзінің ЖСН-ін міндетті түрде көрсетуі қажет. Ал бұған дейін тек алушының ЖСН-ін көрсету талап етілетін.
Ведомство өкілі мұндай операцияларды мобильді қосымша немесе SMS арқылы растау мүмкіндігі де қарастырылып жатқанын айтты.
Сонымен қатар келер жылдың 1 қаңтарынан бастап банктер банкоматтардағы бейнекамерадан жазылған жазбаларды кемінде 180 күн сақтауға міндетті болады. Бұл күмәнді транзакцияларға қатысушыларды жедел анықтауға мүмкіндік береді.
Операцияларды орындау кезінде клиенттердің бет-әлпетін немесе саусақ іздерін тану үшін биометриялық сәйкестендіруді енгізу мәселесі де қарастырылып жатыр. Бұл шараларды іске асыру анонимді аударымдарға қосымша тосқауыл қойып, банк жүйесін көлеңкелі мақсатта пайдалануға байланысты тәуекелдерді азайтады, – деді агенттік төрағасының орынбасары.
