Қазақ өңдеу және тамақ өнеркәсібі ғылыми-зерттеу институтының ғалымдары ірі қара малдың терісін бастапқы өңдеу мен сақтаудың тың тәсілін әзірлеп жатыр, деп хабарлайды F16.kz.
Біздің елде ауыл шаруашылығы саласындағы өзекті мәселенің бірі – ірі қара мал терісінің ысырап болуы. Осы проблеманы шешу үшін елімізде алғаш рет арнайы ғылыми-зерттеу жобасы жүзеге асырылып жатыр. Жобаны Қазақ өңдеу және тамақ өнеркәсібі ғылыми-зерттеу институтының ғалымдары қолға алды. Олар мал терісін бастапқы өңдеу мен сақтаудың жаңа тәсілдерін әзірлеуге кірісті. Негізгі мақсат – терінің сапасын жоғалтпай сақтау, оның жарамдылық мерзімін ұзарту және кейін өндірісте тиімді пайдалану.
Зерттеу барысында ғалымдар Қазақстанда және шетелде қолданылатын 15-тен астам түрлі технологияны талдаған. Нәтижесінде ең тиімді әдістер ретінде ультрадыбыс пен микротолқынды өңдеу, сондай-ақ вакуумдық және аралас кептіру тәсілдері таңдалды. Бұл заманауи технологиялар теріні сақтау уақытын 2–3 есе қысқартып, энергия шығынын азайтады және терінің негізгі құрылымын бұзбай сақтауға мүмкіндік береді.
Ғалымдар теріні сақтау кезінде ылғал мен су мөлшеріне ерекше көңіл бөлген. Себебі дәл осы көрсеткіштер терінің бұзылмауына және микробтардың пайда болмауына тікелей әсер етеді. Зерттеулер көрсеткендей, жаңа алынған теріні уақыт өткізбей өңдеп, сақтауға қою өте маңызды.
Сынақ нәтижелері ультрадыбыстық кептіруді, арнайы сіңіргіш заттарды және төмен температурада қосымша кептіруді бірге қолдану терінің сапасын сақтауға мүмкіндік беретінін көрсетті. Бұл әдіс терінің икемділігін сақтап, экологиялық тұрғыдан да қауіпсіз болып саналады.
Аталған жоба Қазақстан үшін бірегей болып саналады. Ол агроөнеркәсіп саласында ресурсты үнемдейтін заманауи технологияларды енгізуге жол ашады. Жобаны іске асыру арқылы мал терісінің ысырабын азайтуға, отандық былғары өнімдерінің сапасын арттыруға, қоршаған ортаға түсетін жүктемені төмендетуге және тері өңдеу саласын дамытуға мүмкіндік туады, – деп мәлімдеді Ауыл шаруашылығы министрлігі.
