ШҚО-да алдағы жылыту маусымына дайындық қарқынды жүріп жатыр. Өңірге жұмыс сапарымен келген энергетика министрі Ерлан Ақкенженов жылу электр орталықтарындағы жөндеу жұмыстарының барысымен танысты, деп хабарлайды F16.kz.
Айта кетейік, бұған дейін Риддердегі жылу электр орталығы Қазақстан бойынша «қызыл аймаққа» жататын 19 жылу көзінің тізіміне енген. Биыл станцияны жаңғыртуға 6,4 млрд теңге бөлінген. Оның 4,1 млрд теңгесі Үкімет резервінен берілді. Қолға алынған жұмыстардың нәтижсінде ЖЭО «қызыл аймақтағы» орталықтар тізімінен шығарылды. Бұл қаражат екі қазандық агрегатын күрделі жөндеуден өткізуге, тозығы жеткен 6 шақырым жылу желісін ауыстыруға және отын беру жүйесін жаңартуға бағытталды. Аталған жұмыстар станцияның негізгі жабдықтарының тозуын 2,6%-ға, ал жылу желілерінің тозуын 7,7%-ға төмендетуге мүмкіндік береді.
Министр облыс орталығындағы Согра және Өскемен ЖЭО нысандарын аралады. Қазіргі таңда облыстағы үш негізгі станцияның орташа дайындығы — 74,7%, ал турбиналардың дайындығы – 89%. Барлық нысандарда 365,9 мың тонна көмір қоры жиналып, бұл 21-78 күнге дейінгі автономды жұмыс режимін қамтамасыз етеді. Сонымен қатар өңірде 53,9 шақырым жылу желілерін жаңарту жұмысы кестеге сай жүргізіліп жатыр.
Қыстың қақаған аязында әрбір тұрғынның үйі жылы әрі жайлы болуға тиіс. Бүгінгі таңда жұмыс жоспарға сай атқарылып жатыр, бірақ дәл қазір барлық күшті жұмылдыратын сәт. Жұмысты мерзімінен бұрын бітірсек, алдағы жылу маусымына сенімділігіміз де арта түседі. Алайда жұмысты жеделдету сапаға нұқсан келтірмеуге тиіс. Министрлік пен әкімдік бірлесіп жұмыс істеп жатыр. Біздің ортақ еңбегіміздің басты бағасы – жылыту маусымын өңір тыныш әрі апатсыз өткізу болмақ, – деді Ерлан Аккенженов.
Сапары барысында жедел шаралармен қатар Өскемендегі жылу қуатының тапшылығын жоюға бағытталған стратегиялық жобалар да қаралды. Негізгі басымдық – жаңа ЖЭО–3 салу, Өскемен және Согра жылу электр орталықтары арасында жылу магистралін тарту, сондай-ақ қолданыстағы станцияларға жаңа қазанагрегаттар орнату. Бұл жобалардың жүзеге асуы өңірдің ұзақмерзімді энергетикалық қауіпсіздігі мен дамуына берік негіз қалайды.
