Ауа райының күрт бұзылуынан Шығыс Қазақстан облысының көлік жолдарында төтенше жағдайлар болды. Ұлан ауданында ер адам қар құрсауынан құтқарылса, Тарбағатай ауданында жол апатынан бірнеше адам қаза тапты, деп хабарлайды F16.kz.
Кеше, 24 қарашада Омбы – Майқапшағай жолының 877-шақырымында, Тарбағатай ауданы аумағында жол-көлік оқиғасы болды.
Chevrolet Onix жеңіл көлігі мен Howo маркалы жүк көлігі соқтығысқан. Жол апаты салдарынан жеңіл көліктің жүргізушісі мен екі жолаушысы алған ауыр жарақаттан оқиға орнында көз жұмды. Тағы бір жолаушы медициналық мекемеге жеткізілді, – деп хабарлады ШҚО полиция департаментінің баспасөз қызметі.
Күні бойы жауған қардың соңы бұрқасынға айналып, соның салдарынан Ұлан ауданы Сағыр ауылынан 10 шақырым жерде жеңіл көлік жолда қалды.
Автокөлік жүргізушісіне көмекке құтқарушылар келді. Олар жаман жолда іркіліссіз жүретін техникамен діттеген жерге жетіп, ер адамды Өскеменге жеткізді, – деп хабарлады ШҚО ТЖД баспасөз қызметі.
