Көктем келіп, жер қарайып, тіршілік атаулы оянған сәтте, қыс бойы қар астында көрінбей жатқан күл-қоқыс та көкпен бірге жер бетіне шығып, айналаның сәнін бұзады. Қоршаған ортаның тазалығына жауапкершілікпен қарау – әрбір азаматтың басты міндеті. Табиғаттың тынысын ашу мақсатында облыс орталығында санитарлық тазалық жұмыстарына арналған екі айлық жарияланды, деп хабарлайды F16.kz.
Әр сенбіде жастар, қаладағы ұйымдардың мүшелері, шаһар тұрғындары мен мемлекеттік қызметкерлер көшелерді, демалыс орындарын, аулаларды ретке келтіріп, қыс бойы жиналған күл-қоқыстарын жинауды әдетке айналдырған. Бұл жолы ала таңнан басталған жұмыс әдеттегідей бірнеше аймақта, кәсіпорын аумақтары мен аулаларда жүргізілді. Қоршаған ортаны қорғауды мақсат еткен еріктілер Чернобыль атом электр станциясында боғлан алапат апаттың салдарын жоюға атсалысқандардың құрметіне қойылған «Журавль» ескерткішінің маңына жиналды.
«Таза Қазақстан» акциясы аясында кезекті экосенбілік ұйымдастырылды. Мұндай шаралар тек облыс орталығында емес, барлық қала-аудандарда өткізіліп жатыр. Ондағы негізгі идея — қала тұрғындарын бірлікке шақыру, жастарды елін-жерін сүюге үйрету, туған қаламызды тазарту, қоғамда экологиялық мәдениет қалыптастыру, — деді облыстық Жастар ресурстық орталығының директоры Айдос Әділбеков.
Тазалықты жанына серік еткен жастар тек сенбілікте емес, өзге де қоғамдық жұмыста белсенділік танытып, ортақ мекеннің көркеюіне өз үлесін қосып келеді.
Мұндай жұмыс — ұжымдық рухты, бірегейлікті, ауызбіршілікті көрсетеді. Бұл бір күндік акция емес. Мамырдың соңына дейін әр сенбіде шығамыз. Сенбілік барысында көшелер тазарып, келбеті күн санап жаңарады. Өзіміз де мұндай іс-шараға жиі қатысамыз. Былтыр Қазақстан тауы маңын тазаладық. Сенбіліктен бөлек, көшет отырғызу жұмыстарын да жүргіздік, – деді Қазақстан халық партиясы жанындағы жастар қанатының басшысы Ләйлә Төлеубекова.
Жастардың айтуынша, қыстан кейін жиналған қоқыс көп. Сондықтан әр адам тазалықты өзінен бастап, қоршаған ортаны таза ұстауға мән беруі керек.
