Бүгін өскемендіктер Ұлттық Домбыра күнін, Астана күнін, сондай-ақ Теңіз және өзен флоты қызметкерлерінің күнін қатар атап өтіп жатыр. Облыс орталығының тұрғындары мен қонақтары бұл күні түрлі мерекелік шараларды тамашалап, алғаш рет кемелер шеруінің куәсі болды.
Ертіс пен Үлбідей қос өзеннің қосылған тұсында ірге көтерген Өскемен шәрінде су көлігінің болуы – заңдылық. Ал оны дамытып, кәсіпкерлік, туристік мақсатта игілікке жаратудың пайдасы ұшан-теңіз. Сондықтан да облыс басшылығы бұл мәселеге ерекше мән беріп отыр. Бүгінгі шараның қолға алынуы да осыдан туындаса керек.
Кемелер шеруіне қатысқан су көліктері Самал саябағы мен Кемежай ауданы аралығында Ертіс өзенімен сап түзеп жүзіп өтті. Олардың қатарында “Болат Карентаев”, “Алтай”, “КС-111” қатарлы шағын кемелер мен «BELALEKS» катерлері бар. Кемелерге мінген жолаушылар арасында қадірлі ақсақалдар, этномәдени орталықтардың өкілдері, “Жұлдыз” өнер мектебінің қолына домбыра ұстаған оқушылары және қарапайым тұрғындар болды. Бұл салтанатты сәтті көпшілікпен бірге облыс әкімі Нұрымбет Сақтағанов та тамашалап, Өзен вокзалында ел-жұртпен емен-жарқын сұхбаттасты. Ал кемелер тізгін тартқан әр айлақта әуелетіп ән салып, күмбірлетіп күй төккен өнерпаздар мен шығармашылық ұжымдардың өкілдері халықтың көңілін көтеріп, мерекенің көрігін қыздырды.
Мұндай шеруді бірінші рет көрдім, маған ұнады. Көк туымыз желбіреп, ән мен күй асқақтап, қандай жақсы. Балалар мәз. Көңіл-күйіміз керемет. Кейінгі жылдары Ертісте кемелер көбейді, бұл өте дұрыс. Ертеректе бұл өзенмен шағын кемелер ағылып жататын, жолаушылар тасымалдайтын. Сол дәстүрді қайта тірілту керек шығар. Қалай дегенмен су көлігін жолға қойып жатқандары құптарлық іс болды, – деді Өскемен тұрғыны, зейнеткер Дәулет Мұқтарғазы.
