Шығыс Қазақстанда полицейлер қала сыртындағы трассада екі бірдей өрескел құқық бұзушылықтың жолын кесті, деп хабарлайды F16.kz.
Облыстың полиция департаменті баспасөз қызметінің мәліметінше, заңды бұзған екі жүргізуші де бұған дейін көлік басқару құқығынан айырылған және соған қарамастан масаң күйде рөлге отырған.
Өскемен-Алматы жолында Lada Granta көлігінің 42 жастағы жүргізушісі ұсталды. Сараптама нәтижесінде оның есірткі қолданғаны анықталды. Өскемен-Рахман қайнары бағытындағы жолда алкогольді ішімдік ішіп, масаң күйде болған жүргізуші тоқтатылды.
Қазір аталған екі жағдай бойынша сотқа дейінгі тергеп-тексеру жүргізіліп жатыр. Көлік құралдары арнайы тұраққа қойылды, ал жүргізушілерге үйқамақ түріндегі бұлтартпау жазасы берілді. Полиция масаң күйде көлік басқару — қылмыс екенін ескертеді. Заңды қайта бұзғаны үшін қатаң қылмыстық жауапкершілік қарастырылғанын ұмытпау керек.
