«Әділетті және Прогрессивті Қазақстанның Халықтық Конституциясы үшін!» коалициясының мүшелері облыстық сәулет-этнографиялық және табиғи-ландшафтық мұражай-қорығының ұжымымен кездесті, деп хабарлайды F16.kz.
Кездесу барысында коалиция мүшелері білім беру, ғылым, мәдениет және инновацияларды дамытуға ерекше көңіл бөлінгенін атап өтті. Сондай-ақ құжатта ұлттық бірегейлікті нығайту, тарихи-мәдени мұраны сақтау және оны келер ұрпаққа жеткізу мәселелері маңызды бағыттардың бірі ретінде айқындалғаны айтылды.
Жаңа Конституцияда ұлттық мәдениетті дамыту, тарихи-мәдени мұраны сақтау сияқты мәселелер де нақты көрініс тапқан. Мұның бәрі ұлттық болмысымызды сақтауға және рухани құндылықтарды келер ұрпаққа жеткізуге бағытталған маңызды қадам деп білемін. Жоба аясында білім беру, ғылым, мәдениет және инновация салаларын дамытуға ерекше назар аударылады. Өйткені қазіргі заманда адам капиталы — кез келген елдің бәсекеге қабілеттілігінің басты факторы, – деді коалиция мүшесі Шынар Боранбаева.
Кездесу соңында музей ұжымы жаңа Конституцияға қолдау білдіріп, 15 наурыз күні референдумға белсене қатысатындықтарын жеткізді.
