Елімізде туризмді дамыту мәселесі қызу талқыланып жатқанда премьер—министрдің орынбасары Ермек Көшербаев еңбек демалысын қалай және қайда өткізетінін айтты, деп хабарлайды F16.kz.
Бұл туралы ол Үкіметтің баспасөз мәслихатында мәлім етті. Президент тапсырмасына сәйкес елдегі туристік нысандарға жүргізілген тексерулерден кейін нақты қандай іс-шаралар қолға алынып, қандай жұмыстар атқарылатынын баяндаған Ермек Көшербаевтан журналистердің бірі: “Өзіңіз қай туристік базада демалғанды құп көресіз?” деп сұрады.
Мен жағажайда күнге қыздырынып жататын “гриль демалысты” аса ұнатпаймын. Одан гөрі саяхаттағанды жақсы көремін. Жалпы, жұмыс барысында көп жүреміз, сапарларға шығамыз. Кейінгі төрт жылдың ішінде бір рет ғана, былтыр еңбек демалысын алдым. Сол кезде үш күн Еуропаға барып қайттым, қалған төрт күнді Бұқтырма су қоймасының (Шығыс Қазақстан обл. – ред.) жағалауындағы Приморск деген тамаша демалыс базасында өткіздім. Бұл демалыс базасы жағажай туризмімен айналысатын көп кәсіпкерге үлгі деуге болады, – деді вице-премьер.
