International Boxing Federation қазақстандық кәсіпқой боксшы Жәнібек Әлімханұлын орта салмақтағы әлем чемпионы атағынан айырды. Бұл туралы Қазақстан кәсіпқой бокс федерациясының президенті Рақымжан Ерденбеков мәлімдеді, деп хабарлайды F16.kz.
Федерация басшысының айтуынша, мұндай шешім ұйымның қатаң талаптары мен ережелеріне байланысты қабылданған.
IBF шешімі келді. Бұл ұйымының қатал ережелері бар, хатында соған сілтеме жасалған. Хатқа сәйкес, Жәнібек Әлімханұлы 2026 жылғы 2 желтоқсанға дейін шеттетіледі. Сондай-ақ ережелер бойынша әрбір чемпион өз белбеуін тоғыз ай ішінде қорғауға тиіс, яғни Жәнібек оны 2026 жылғы 4 шілдеге дейін қорғауға тиіс. Осы жағдайға байланысты биылғы 5 наурызда IBF директорлар кеңесі чемпиондық титулды бос деп жариялау туралы шешім қабылдады, — деді Қазақстан кәсіпқой бокс федереациясының президенті.
Еске сала кетсек, 2025 жылғы желтоқсанда Жәнібек Әлімханұлы допинг-тестіден өте алмай қалған. Тексеру кезінде оның қан құрамынан рұқсат етілмеген зат анықталған. Осыған байланысты Қазақстан кәсіпқой бокс федерациясы спортшыны алты айға жекпе-жектерден шеттетті. Соған қарамастан қазақстандық боксшы әлі де World Boxing Organization нұсқасы бойынша орта салмақтағы әлем чемпионы болып саналады. Алайда ұйым ақпан айында оны допинг сынамасы оң нәтиже көрсеткеннен кейін биылғы 2 желтоқсанға дейін бір жылға шеттеткен.
