Облыс әкімдігінде өңір мен Өскемен қаласындағы экологиялық жағдайды оңалтуға бағытталған маңызды құжаттарға қол қойылды, деп хабарлайды F16.kz.
Бүгін Дүниежүзілік қоршаған ортаны қорғау күні аясында Шығыс Қазақстан облысының әкімдігінде Өскемен қаласының ірі кәсіпорындары мен мемлекеттік органдар басшылары, экологтар мен қоғамдық ұйымдар өкілдері қатысқан алқалы жиын өтті. Жиынға облыс әкімі Нұрымбет Сақтағанов төрағалық етті.
Басқосуда қолайсыз метеорологиялық жағдайда, сондай-ақ экологиялық төтенше жағдайлар кезіндегі мемлекеттік органдар мен өндіріс орындары арасындағы өзара іс-қимылды реттеуге бағытталған меморандумға қол қойылды.
Атап айтсақ, бұл күні өңір экологиясы үшін маңызды құжатқа «Казцинк» ЖШС, «ТМК» АҚ, «ҮМЗ» АҚ, «Востокмашзавод», Өскемен май зауыты, сондай-ақ, барлық жылу энергетика нысандары – Өскемен ЖЭО, Согра ЖЭО, «Шығыс жылу» АҚ басшылары қол қойды.
– Меморандумға қол қою рәсімінің 5-маусым – дүниежүзілік қоршаған ортаны қорғау күнімен және экологтар кәсіби мерекесімен тұспа-тұс келуі – ерекше мәнге ие. Бұл күні табиғатты сақтау жолында еңбек етіп жүрген, экологиялық ағарту, бақылау және маңызды шешімдерді енгізумен айналысатын барша жанға шынайы алғыс айтамын. Өндіріс орындары басшыларына ашық диалог пен бастамамызға қолдау білдіргені үшін ризашылығымды білдіремін. Тек серіктестік, өзара сенім және тұрақты даму арқылы ғана өңіріміздің экологиялық әл-ауқатын сақтап, ахуалды жақсарта аламыз. Қатысушыларды осы құжатпен шектеліп қалмай, бұл бағытта жүйелі жұмысты жалғастырып, ең озық қолжетімді технологияларды енгізуге, экологиялық жауапкершілік пен өндірістік мәдениетті арттыруға шақырамын, – деді облыс әкімі Нұрымбет Сақтағанов.
Меморандум қолайсыз метеорологиялық жағдай мен экологиялық сипаттағы төтенше жағдайлар кезінде барлық тараптың үйлестірілген іс-қимылдарын көздейді. Бұл – шығарындыларды жедел түрде азайту, ақпарат алмасудың ашықтығы, мониторингке қатысу және ең бастысы – қоршаған ортаның ластануын болдырмауға бағытталған алдын алу шаралары. Бұл туралы «Өскемен тынысы» экологиялық қорғау бюросының жетекшісі Елена Березинская-Абилова айтты.
– Аталған меморандумның бұрынғы құжаттардан ең басты артықшылығы – енді экологиялық сипаттағы төтенше жағдай кезінде арнайы құрылған жұмыс тобы кәсіпорындар аумағына ешқандай рұқсат құжатынсыз еніп, тексеріс жүргізе алады. Бұған дейін қоршаған орта қорғаушыларында мұндай мүмкіндік болмаған. Тіпті, енді бұл жұмыс топтарының құрамына экологтар мен басқа құзырлы органдар мамандарынан бөлек, қоғамдық ұйымдар мен бұқаралық ақпарат құралдарының өкілдері де кіруі мүмкін. Түптеп келгенде, мұның бәрі экологияға қатысты ақпараттың сенімділігін арттыруға септігін тигізері сөзсіз, – дейді «Өскемен тынысы» бюросының жетекшісі.
Фото: ШҚО әкімінің баспасөз қызметі
