Германияда өткен ITB Berlin халықаралық туристік көрмесінде Шығыс Қазақстан облысының делегациясы өңірдің туристік әлеуетін ғана емес, жергілікті гастрономиялық өнімдерін де таныстырды. Ұлттық тағамдар мен табиғи өнімдер көрме қонақтарының ерекше қызығушылығын тудырды, деп хабарлайды F16.kz.
Көрмеге қойылған дәстүрлі қазақ тағамдары қонақтар назарын бірден аударды. Олардың қатарында көптің қызығушылығын туғызған «Багратион» компаниясының құрт, ірімшік, женті, сондай-ақ «Медовая марка» компаниясының бал шарабы, пантасы мен бал өнімдері бар. Келушілер ұсынылған өнімдерді тамашалап ғана қоймай, бірегей тағамдардың дәмін татып көріп, олардың табиғи ерекшелігін жоғары бағалады. Сатып алып жатқандар да аз болмады.
Берлин төріндегі халықаралық көрмеде ұсынылған тағамдар Шығыс Қазақстанның табиғи байлығы мен ұлттық аспаздық дәстүрін Еуропаның талғампаз халқына кеңінен паш етті.
Халықаралық көрмеге қатысу өңірлік брендтерді таныстыруға, жаңа серіктестік байланыстар орнатуға және Шығыс Қазақстан облысын бірегей туристік бағыт ретінде әлемдік деңгейде ілгерілетуге тамаша мүмкіндік болды.
