Үкімет үй жануарларын ұстау мәдениетін қатаң бақылауға алуды жоспарлап отыр. Экология және табиғи ресурстар вице-министрі Нұркен Шәрбиев айыппұл мөлшерінің орташа есеппен 2,5 есеге өсетінін мәлім етті, деп хабарлайды F16.kz.
Жануарларға қатыгездік көрсету
Бұрын мұндай құқық бұзғандарға 5 АЕК көлемінде айыппұл салынса, енді оның мөлшері 30 АЕК-ке (129 750 теңге) дейін өседі. Лауазымды тұлғаларға айыппұл мөлшері – 50 АЕК.
Үй жануарынан бас тартудың жазасы қатал
Алғаш рет «жануардан бас тарту» үшін жауапкершілік енгізілмек. Егер иесі үй жануарын панажайға өткізбей немесе басқа адамға табыстамай далаға тастап кетсе, жеке тұлғалар 30 АЕК (129 750 теңге), ал компанияларға 100 АЕК-ке дейін айыппұл салынады.
Серуендету және күтіп-бағу ережесі
Жануарларды аулау, ұстау немесе серуендету ережелерін бұзғандар 15 АЕК (64 875 теңге) көлемінде айыппұл төлейді.
Ең жоғары санкция
Егер жануарды ұстау ережесін бұзу салдарынан адамдардың денсаулығына немесе өзге тұлғалардың мүлкіне зиян келсе, жаза өте қатаң болады:
- Жеке тұлғаларға – 100 АЕК (432 500 теңге);
- Құқық бұзу жағдайы қайталанса — 150 АЕК-ке дейін;
- Заңды тұлғаларға – 400 АЕК-ке (1,7 млн теңге) дейін.
Ит салығы енгізілмейді
Айта кетерлігі, үй жануарларына салық енгізу туралы бастама ресми түрде қабылданбады. Билік өкілдері мұндай шара адамдардың өз итінен жаппай бас тартуына әкеп соғуы мүмкін деп есептейді.
Мемлекеттің басты мақсаты — адаимдардың қауіпсіздігін қамтамасыз ету, көшеде тәртіп орнатып, адамдарды өз итіне жауапты болуға міндеттеу.
