Шығыс Қазақстан облысында кәмелетке толмағандардың қауіпсіздігін қамтамасыз етуге бағытталған «Назар аударыңыз – балалар!» жедел-профилактикалық іс-шарасы жалғасып жатыр. Үш күн ішінде полиция қызметкерлері мемлекеттік органдар өкілдерімен бірлесіп, 183 рейдтік іс-шара өткізген, деп хабарлайды F16.kz.
Профилактикалық рейдтер барысында 101 кәмелетке толмаған бала полиция бөлімдеріне жеткізілді. Оның ішінде қараусыз және қадағалаусыз қалған 8 жасөспірім бейімдеу орталығына орналастырылған.
Жалпы жүргізілген жұмыстардың нәтижесінде 128 әкімшілік құқық бұзушылықтың жолы кесілді. Іс-шараның тағы бір маңызды бағыты – жасөспірімдер арасында есірткіге тәуелділіктің алдын алу. Осы бағытта 11 профилактикалық іс-шара ұйымдастырылып, балаларға есірткі заттарын қолданудың қауіпі түсіндірілді. Мамандар жасөспірімдерге өз денсаулығына жауапкершілікпен қараудының маңызын атап өтті, — дейді ШҚО ПД баспасөз қызметі.
Полицияның мәліметінше, «Назар аударыңыз – балалар!» жедел-профилактикалық іс-шарасы 20 тамызға дейін жалғасады. Осы уақыт аралығында рейдтік және профилактикалық жұмыстар күшейтіліп, кәмелетке толмағандардың қауіпсіздігіне, құқық бұзушылықтардың алдын алуға және балалардың қатысуымен болатын төтенше жағдайларға жол бермеуге басымдық беріледі.
