Шығыс Қазақстан облысындағы Катонқарағай ауданы табиғи-ландшафтық әлеуеті мен қолжетімділіктің артуы арқасында өңірдегі туризмнің жетекші орталықтарының біріне айналып келеді.
Соңғы жылдары туристік саланың қарқынды дамуы бұл бағытты аудан экономикасының басым бағыты ретінде айқындауға мүмкіндік берді. Осыған байланысты жергілікті әкімдік туризм инфрақұрылымын дамытуға ерекше назар аударып отыр, деп хабарлайды F16.kz cайты.
Туристер саны бірнеше есеге артты
Аудан әкімдігінің мәліметінше, соңғы жылдары туристер саны айтарлықтай өскен. Өткен кезеңмен салыстырғанда келушілер саны бес есеге артса, орналастыру орындарының саны 2,5 есеге көбейген. Қызмет көрсету сапасы да 20 пайызға жақсарған.
Бүгінде жалпы құны 37,8 млрд теңгені құрайтын төрт ірі инвестициялық жобаны жүзеге асыру жоспарланып отыр. Олардың қатарында Катонқарағай ауылында халықаралық стандарттарға сай қонақүй салу, құны 6 млрд теңге болатын туристік қалашық тұрғызу, Шұбарағаш ауылындағы «Димаш» сауықтыру кешенін толық жаңғыртып, оны тау шаңғысы орталығына айналдыру және Катонқарағай ауылында этно-қонақүй салу жобалары бар.
— Бұл жобалар ауданның туристік тартымдылығын арттырып, халықаралық деңгейдегі бағытқа айналуына мүмкіндік береді, — деп хабарлады аудан әкімдігінен.
Халықаралық фестиваль
Туризм саласының дамуына алдағы айда өтетін «Алтай – түркі әлемінің алтын бесігі» мәдени-туристік фестивалі де серпін бермек. Үш күнге жоспарланған ауқымды іс-шара ұлттық мәдениет, өнер және спорт бағыттарын қамтиды.
Фестиваль сахнасында Қазақстаннан бөлек ТМД елдері, Венгрия және Түркиядан келген өнерпаздар өнер көрсетеді. Шараның басты хедлайнері – Димаш Құдайберген.
Көлік және инфрақұрылым жаңғыртылуда
Туристердің өңірге қолжетімділігін арттыру мақсатында жол инфрақұрылымы кезең-кезеңімен жаңартылып жатыр. Язовое көліне апаратын жолдағы көпірді қайта жаңғыртуға 117 млн теңгеден астам қаржы бөлінген. Сонымен қатар Катонқарағай және Шыңғыстай ауылдарындағы жолдарды жөндеуге 90 млн теңге қарастырылған.
Бұдан бөлек, «Жаңаүлгі – Жамбыл – Берел», «Согорное – Барлық – Ақсу» бағыттарындағы жолдар мен Коробиха ауылына апаратын жолды жөндеу жоспарланған. Сондай-ақ «Өскемен – Алтай – Үлкен Нарын – Катонқарағай – Рахман қайнарлары» халықаралық маңызы бар магистральды жаңғырту жұмыстары жүргізілуде. Бұған қоса аудан аумағында әуежай салу жобасы да қарастырылып отыр.
Туризмнің маңызды факторы
Ауданның туристік тартымдылығын арттыруда цифрлық инфрақұрылым да маңызды рөл атқарады. Жоспарға сәйкес, 2027 жылдың соңына дейін 1073 тұрғыны бар жеті елді мекенге интернет біртіндеп жеткізіледі. 2026 жылдың соңына дейін Жаңа Үлгі ауылы интернетке қосылады. Халқы аз Акшарбақ және Бекалка ауылдары да 2027 жылға дейін байланыспен қамтылмақ.
Шағын бизнес пен экологияға қолдау
«Ауыл аманаты» бағдарламасы аясында да бірқатар жобалар жүзеге асырылуда. Биыл жалпы сомасы 50 млн теңгеден асатын үш жоба мақұлданды. Оның екеуі ара шаруашылығын дамытуға, біреуі туризм саласына бағытталған.
Сонымен қатар ауданның санитарлық жағдайын жақсарту мақсатында Катонқарағай ауылын абаттандыру, қоқыс контейнерлерін сатып алу және бес қоқыс полигонын ұйымдастыруға 30 млн теңге бөлінген.
