Шығыс Қазақстан облысында кәсіпорын қаза тапқан жүргізушінің отбасына 11 млн теңге көлемінде моральдық өтемақы төлеуге міндеттелді. Бұл туралы облыстық соттың баспасөз қызметі мәлім етті, деп хабарлайды F16.kz.
2023 жылы жұмыс кезінде кәсіпорын жүргізушісі қаза тапты. Оның артында кәмелетке толмаған үш баласы қалды. Тергеу актісіне сәйкес, қайғылы оқиғаға жұмыс берушінің еңбек қауіпсіздігі талаптарын бұзуы себеп болған.
Бұған дейін кәсіпорын мен марқұмның жесірі 8 миллион теңге көлемінде моральдық зиян үшін өтемақы төлеу туралы келісімге келген. Алайда жесірі мен марқұмның апа-қарындастары бұл соманы жеткіліксіз деп тауып, қосымша өтемақы өндіру туралы талаппен Алтай аудандық сотына жүгінді.
Зардап шегуші тарап балалардың пайдасына төленіп жатқан ай сайынғы 81 мың теңге көлеміндегі аннуитеттік төлемдер олардың тәрбиесі мен білім алуына жұмсалатын шығындарды толық өтемейтінін атап өтті. Сондай-ақ отбасы мүшелері жақын адамын жоғалтқаннан кейін қатты күйзеліп, өмірдің астаң-кестеңі шыққанын атап өткен, – делінген хабарламада.
Істі қарау барысында сот тергеу актісі кәсіпорынның жауапкершілігін растайтынын атап өтті. Жауапкердің өкілі талаптардың бір бөлігін мойындап, тиісті өтемақы төлеуге келісім берді.
Сот шешімінде моральдық зиянның субъективті бағасымен қатар, объективті жағдайлар да ескерілген: қайғылы оқиғаның кенеттен болуы, асыраушысынан айырылу, жақындарына тигізген эмоционалдық және психологиялық салдар. Шешімде жақын туысының қазасы зардап шегуші тарапқа елеулі моральдық зиян келтіргені көрсетілген. Азаматтың өлімі әпке-қарындастарына ауыр соққы болып тисе, жесірі кәмелетке толмаған үш баламен жалғыз қалды.
Сот зардап шеккендер пайдасына 11 миллион теңге көлемінде моральдық зиян өтемақысын өндіру туралы шешім шығарды: қаза тапқан азаматтың әр баласына 3 миллион теңгеден, ал әпке-қарындастарының әрқайсына 1 миллион теңгеден.
Кәсіпорын бұл шешімге апелляциялық тәртіппен шағым түсірген, алайда жоғары тұрған сот бірінші сатыдағы соттың шешімін өзгеріссіз қалдырды.
