Облыс орталығында Қазақстан, Қырғызстан және Ресейден келген дизайнерлер бас қосты. Оның басты себебі — Kazakhstan Fashion Week Oskemen сән шеруі. Еліміздің сән индустриясында өзіндік орны бар шара биыл Шығыстың бас шаһарында, өзгеше форматты ұйымдастырылды, деп хабарлайды F16.kz.
Айта кету керек, аталмыш сән шеруі Өскеменде екінші рет қатарынан ұйымдастырылып отыр. Биылғы маусымда алты дизайнер, атап айтқанда Фатима Сулейменова, Залкар Асқарали (ZALKAR), Динара Сеитова, Алексей Чжен, Адиля Ботабаева және Бекназар Алмазбек өздерінің жаңа топтамаларын ұсынды.
Сән көрсетілімін қаламызда екінші рет ұйымдастырып отырмыз. Қызығушылық өте жоғары және жергілікті сәнгерлерге де жаңа идея мен мотвация берері анық. Әлемдік деңгейде танылған дизайнерлермен бір алаңда бас қосып, жақынырақ танысу — сән әлемін жаңа деңгейге көтеруге мүмкіндік берері анық. Шараны өткізу үшін үш айдан астам уақыт дайындалдық, жиналғандардың көңілінен шықты деп ойлаймын, — дейді жоба ұйымдастырушысы Лилия Каирова.
Сән көрсетіліміне алыстан ат терлетіп келген қонақтар қатарында еліміздің сән индустриясында із қалдырған, белгілі сәнгер, байер Лилия Рах бар.
Бұл жолы Fashion Week-ке болашағынан үміт күттіретін, талантты дизайнерлер қатысып жатыр. Олардың жұмыстарын тамашалап, кәсібилігі мен дарынына тағы бір мәрте куә болдым. Маған Өскемен қаласы қатты ұнайды. Осындай әдемі қаланың жастары да алдағы уақытта әлемдік сахналардан көрінеді деп сенемін. Тек тоқтамай, үнемі ізденісте болу керек, — дейді ол.
Ел назарына ұсынылған жаңа топтамалар көпшіліктің ыстық ықыласына бөленіп, шығармашылық ортаға тағы бір мәрте шабыт берді.
