Қазақстан мен Қатар үкіметтері арасындағы жұмысқа орналастыруды реттейтін келісім ресми түрде күшіне енді. Соған сәйкес ел азаматтары Катарда заңды түрде жұмыс істей алады. Бұл туралы Еңбек және халықты әлеуметтік қорғау министрлігі мәлімдеді, деп хабарлайды F16.kz.
Қатардың Сыртқы істер министрлігі дипломатиялық арналар арқылы келісімді іске асыруға қажетті барлық ішкі рәсімдердің аяқталғанын Қазақстан Үкіметіне ресми түрде хабарлаған. Аталған құжатқа былтыр 14 ақпанда Мемлекет басшысының Дохаға ресми сапары кезінде қол қойылған.
Келісім 2025 жылы ҚР Парламентінде мақұлданып, 20 қазанда Президенттің қол қоюымен заңды күшіне енді. Оның негізгі мақсаты – қазақстандық азаматтардың Қатарда қауіпсіз, ашық әрі заңды түрде еңбек етуіне жағдай жасап, олардың әлеуметтік және құқықтық қорғалуын қамтамасыз ету.
Құжатта жұмысшыларды іріктеу, біліктілігін тексеру, еңбек шартын жасасу тәртібі нақты көрсетілген.
Сонымен қатар қазақстандық мамандарға жолақы, тұрғын үй, медициналық қызмет шығындарын өтеу, еңбек пен демалыс режимі, еңбекақы төлеу шарттары және келісім мерзімінен бұрын бұзылған жағдайда құқықтарын қорғау кепілдіктері қарастырылған.
Келісімнің орындалуын бақылау үшін екі елдің еңбек министрліктері өкілдерінен бірлескен комитет құрылады. Ал Қатар жұмыс берушілері ұсынатын бос жұмыс орындары migration.enbek.kz порталында жарияланып, азаматтарға ресми әрі ашық қолжетімді болады.
