Ғылым және жоғары білім министрлігі Қазақстан Республикасының азаматтығын алу немесе оны қалпына келтіру кезінде өтетін тестілеу тәртібін бекітті. Жаңа талаптарға сәйкес үміткерлер мемлекеттік тілді қарапайым деңгейде меңгергенін, Конституция негіздері мен Қазақстан тарихы бойынша базалық білімін растауға тиіс, деп хабарлайды F16.kz.
Тестілеу Қазақстан азаматтығына үміткер тұлғаларға арналған. Алайда бұл талап кәмелетке толмағандарға, әрекетке қабілетсіз деп танылған азаматтарға, ел алдында ерекше еңбегі бар адамдарға, Президент айқындаған мамандық иелеріне, этникалық қазақтарға, сондай-ақ халықаралық келісімдер негізінде азаматтықты жеңілдетілген тәртіппен алатын тұлғаларға қолданылмайды.
Емтихан үш бөлімнен тұрады: қазақ тілін қарапайым деңгейде меңгеру, Қазақстан Республикасы Конституциясының негізгі қағидалары және Қазақстан тарихы. Қазақ тілі бойынша тапсырмалар тыңдалым мен оқылым бағыттарын қамтиды.
Жалпы тест 100 сұрақтан тұрады: қазақ тілі – 30, Конституция негіздері – 40, Қазақстан тарихы – 30. Әр сұраққа төрт нұсқа ұсынылып, бір дұрыс жауап таңдалады. Бір дұрыс жауап бір баллмен бағаланады. Тестілеуге 2 сағат 10 минут уақыт беріледі, ал мүгедектігі бар азаматтарға қосымша 30 минут қарастырылған.
Тестілеуден сәтті өту үшін кемінде 50 балл жинау қажет. Оның ішінде қазақ тілінен – 15, Конституция негіздерінен – 20, Қазақстан тарихынан – 15 баллдан төмен болмауы тиіс.
Емтихан жылына екі рет — ақпан және тамыз айларында өткізіледі. Тестілеудің нақты уақыты мен орны уәкілетті орган тарапынан белгіленеді.
Тестке қатысу кезінде үміткер азаматтығы жоқ адамның куәлігін, шетелдік паспортты немесе Қазақстанда тұруға берілген ықтиярхатты ұсынуы қажет.
Тестілеуден қажетті балл жинаған шетел азаматтары мен азаматтығы жоқ тұлғаларға қазақ тілінде электрондық сертификат беріледі. Құжат тестілеуден кейін жеке кабинетте қолжетімді болады және екі жыл мерзімге жарамды. Сертификатты Ұлттық тестілеу орталығының ресми сайтында жеке сәйкестендіру деректері арқылы тексеруге болады.
