«Қазақстан халқына» қоғамдық қоры жаңа оқу жылына 500 грант бөлді, деп хабарлайды F16.kz тілшісі Ғылым және жоғары білім министрлігіне сілтеме жасап.
2025-2026 оқу жылында «Қазақстан халқына» Қоғамдық қорының Білім беру гранттары» қайырымдылық бағдарламасы аясында талапкерлерге жоғары оқу орындарында оқуға 500 білім беру гранты бөлінді.
Бағдарлама шарты негізінде білім беру грантына мынадай санаттағы талапкерлер үміткер бола алады:
- ауылдық жерлердегі, шағын және моноқалалардағы аз қамтылған отбасылардан шыққан балалар;
- жетім балалар немесе кәмелетке толғанға дейін ата-анасының қамқорлығынсыз қалғандар;
- мүгедектігі бар азаматтар;
- мүгедек балаларды тәрбиелеп отырған отбасылардан шыққан балалар;
- 2022 жылғы қайғылы қаңтар оқиғалары кезінде қаза тапқан Қазақстан Республикасы азаматтарының балалары;
- 2022 жылғы қайғылы қаңтар оқиғалары кезінде жарақат алған балалар.
Айта кетейік, бағдарламаға қатысудың шекті жасы – толық 29 жас. Білім беру гранты бір реттік тәртіппен атаулы грант негізінде ұсынылады. Бұл грант жоғары білімі бар азаматтарға, сондай-ақ республикалық немесе жергілікті бюджет қаражаты есебінен «бакалавр» дәрежесін алу үшін мемлекеттік білім гранты тағайындалған адамдарға екінші жоғары білім алу мен онлайн-оқу мақсаттарына берілмейді.
– Грант тағайындалатын үміткерлердің тізімі ағымдағы күнтізбелік жылы ҰБТ-дан өткен және оның нәтижелері бойынша оқуға түсу үшін қажетті шекті балын жинаған (оның ішінде шығармашылық емтихандарды ескере отырып) талапкерлер қатарынан құралады. Тізім жоғары оқу орнының немесе филиалдың конкурстық комиссиясы отырысының хаттамасы түрінде рәсімделеді, – деп жазады дерек көзі.
ЖОО тізімі, грант саны және іске асыру жоспары бойынша толық мағлұматпен «Қазақстан халқына» ҚҚ ресми сайтында (qazaqstanhalqyna.kz) таныса аласыздар.
