Бүгін, 22 тамызда шайбалы хоккейден Қазақстан кубогының алғашқы ойындары өтті. Өскеменнің Б.Александров атындағы спорт сарайында болған кездесуде жергілікті «Торпедо» «Ақтөбені» 4:2 есебімен жеңді. Матчты Шығыс Қазақстан облысының әкімі Нұрымбет Сақтағанов тамашалады, деп хабарлайды F16.kz.
Айта кетейік, ел кубогын сарапқа салып жатқан cегіз команда өткен маусымдағы рейтинг бойынша іріктеліп, екі топқа бөлінген. “А” тобындағы “Арлан”, “Сарыарқа”, “Горняк” және “Бейбарыс” Қарағандыда ойнаса, “В” тобындағы “Торпедо”, “Алматы”, “Ақтөбе” және “Құлагер” хоккейшілері Өскеменде шеберлік байқасады.
Бүгін командалар алғашқы матчтарын ойнады. “А” тобында “Арлан” мен “Бейбарыс, “Сарыарқа” мен “Горняк” өзара ұпайға таласса, “В” тобында “Алматы” мен “Құлагер”, “Торпедо” мен “Ақтөбе” “кім мықтыны” анықтады.
Өскемендік ұжым Ақтөбеден келген қарсыласын айқын басымдықпен жеңді. Есеп – 4:2. Жеңімпаздар сапында Владимир Боровков, Никита Колобов, Дмитрий Гренц және Эрик Алдабергенов мергендігімен көзге түсті. Сөйтіп бас бапкер Андрей Корабейников шәкірттері екі ұпайды еншіледі. Матчтан кейін дәстүр бойынша облыс әкімі «Торпедо» хоккейшілерімен кездесіп, тартысты ойын мен сенімді жеңіс үшін алғыс айтып, сәттілік тіледі.
Біз сіздерге сенеміз және жаңа жеңістер тілейміз, – деді Нұрымбет Сақтағанов.
Келесі кездесулерін «Торпедо» хоккейшілері 23 тамызда кешкі сағат 17.00-де Петропавлдың “Құлагерімен”, 25 тамызда сағат 19.00-де Алматының “Алматы” командасымен өткізеді. Б.Александров атындағ спорт сарайында болатын барлық матчтарға кіру тегін.
Топтық кезеңнің қорытындысы бойынша ұпай санымен бірінші және екінші орын алған командалар жартылай финалға шығады.
Жартылай финалдың ойындары 28 тамызда, ал финал 29 тамызда Қарағанды қаласында болады.
